ஈழத்தைச் சார்ந்த ஆய்வாளரும், யாழ் பல்கலைக் கழகத்தில் விரிவுரையாளராக இருந்தவரும், ஈழ விடுதலைப் போராட்டத்தில் ஈடுபட்டவரும், தமிழீழம், புவிசார் அரசியல் மற்றும் சர்வதேச அரசியலை தொடர்ந்து ஆய்ந்துவருபவரும், உலக வரலாற்று-அரசியல் அறிவியலை ஆய்வு செய்வதை தனது முழுநேரப் பணியாகக் கொண்டிருப்பவரும், பல அரசியல்-வரலாற்று நூல்களின் ஆசிரியருமான திரு. மு.திருநாவுக்கரசு அவர்களின் கட்டுரைகள், உரைகள், காணொலிகள் இத்தளத்தில் இடம்பெறுகின்றன.
ஊடறுப்பு இணையதளத்திற்கு வழங்கிய நேர்காணல். 05-04-2026.
ஈரானின் போர்க் கப்பலை அமெரிக்கா இலங்கையின் கடல் எல்லையில் வைத்து தாக்கி அழித்ததானது, இலங்கை சிங்கள அரசிற்கும், அது தனது அடிப்படை நண்பனாக கொண்டுள்ள சீனாவிற்கும் சில எச்சரிக்கைகளை சொல்லியுள்ளது.
இலங்கையின் பொருளாதாரம் இந்த அமெரிக்காவின் ஈரான் மீதான போரினால் இன்னும் மோசமான நிலையை அடையக் கூடும். இந்த ஆண்டின் இறுதிக்குள் இலங்கையில் பொருளாதாரப் பின்னடைவு - recession ஏற்படும் ஆபத்து இருக்கிறது.
இந்த ஆபத்து காலத்தில் தான் ஈழத்தமிழர்கள் சிங்கள அரசை எதிர்த்த தங்கள் போராட்டங்களை அதிகப்படுத்த வேண்டும். சிங்கள அரசு மேலும் மேலும் நெருக்கடிக்கு உள்ளாகும் போது மட்டுமே அது தமிழர்கள் தங்களுக்கான தீர்வை நோக்கி செல்வதை தடுக்க இயலாமல் நிற்கும்.
சிங்கள அரசுகள் உலகில் உள்ள சீன, இந்திய, அமெரிக்க வல்லரசுகளுடன் நயந்து பயந்து நடித்து தனது பொருளாதார நிலையை தக்க வைத்துக் கொண்டு தன்னை காத்துக் கொண்டே இருந்தால் அது தனது இறுதி இலக்கான தமிழரை இலங்கையில் இருந்து துடைத்து அழிப்பதை செய்து முடிக்கவே முயலும். ஒரு போதும் தமிழருக்கான அமைதி , உரிமைகளை தருவது பற்றி சிந்திக்கவே சிந்திக்காது.
ஊடறுப்பு இணையதளத்திற்கு வழங்கிய நேர்காணல். 01-04-2026.
அமெரிக்காவின் பச்சைக்கு எதிரான போர்தான் ஈரான் மீதான போர். ஈரான் யுத்தத்திற்குப் பின்னால் இஸ்லாமியருக்கு காத்திருக்கும் பெரும் ஆபத்து.
இலங்கைக்கு நிதி நெருக்கடி வரும் நேரங்களில் எல்லாம் அதற்கு பண உதவிகளை அள்ளிக் கொடுக்கும் அமெரிக்காவும், இந்தியாவும் இலங்கையின் அரசுகள் எப்போதும் சீனாவுடன் கைகோர்த்து நிற்கும் இலங்கையின் தன்மையைக் கண்டு எரிச்சலாகவே உள்ளன.
உலக தாதா தன்னை விட சீனாவை நெருங்கி இலங்கை சென்றால் அதன் நிலைமையை தான் எப்படி கையாளும் என்று ஒரு எடுத்துக்காட்டு காட்டி புரியவைக்கத் தான் ஈரானின் போர்க் கப்பலை இந்திய எல்லை தாண்டி, இலங்கை கடல் எல்லையில் ஏவுகணை வீசித் தாக்கி அழித்தது அமெரிக்கா. இந்தியா இதில் தனக்கு பங்கு இல்லை என்று சொன்னாலும், இந்தியாவிற்கு தெரியாமல் அதன் மௌனமான அங்கீகாரம் இல்லாமல் அமெரிக்கா இத்தகைய தாக்குதலை செய்ய வாய்ப்பு இல்லை.
-- .. -- -- -- -- -- -- --
இப்போது அமெரிக்கா ஈரான் மீது செய்திருக்கும் யுத்தமானது தற்போதுள்ள உலக ஒழுங்கை Geo-political order , மாற்றிவிடவில்லை. ஆனால் குழுப்பி இருக்கிறது. வலுவான சம பலமுள்ள இரு நாடுகள் போரிடும் போது மட்டுமே உலக ஒழுங்கானது மாற்றி அமைக்கப்படும் சாத்தியம் உள்ளது. அமெரிக்கா-ஈரான் மோதலில் அத்தகைய சாத்தியப்பாடுகள் இல்லை.
யுத்தங்கள் இல்லாமல் உலக ஒழுங்கை மாற்ற அமெரிக்கா பனிப்போர் காலத்தில் சீனாவுடன் உறவுகளை புதுப்பித்துக் கொண்டது. சீனா-ரஷ்யா இடையேயான உறவை முறிக்க அமெரிக்கா செய்த இந்த தந்திரமானது சீனாவை ரஷ்யாவிடமிருந்து பிரித்தது. அதனால் சோவியத் யூனியன் விழுவது துரிதப்படுத்தப்பட்டது.
ஆனால் சீனா தன்னை உலக வல்லரசாக வளர்த்துக் கொள்ளவும் அந்த நகர்வு உதவியது. 40 வருடங்களுக்குப் பின்பு, இன்று, அதே சீனா உலக வர்த்தகத்தில் அமெரிக்காவிற்கு சவால் விடும் இடத்திற்கு வளர்ந்துள்ளதை தனது நெருக்கடியாக பார்க்கும் அமெரிக்கா அத்தகைய நிலையை குலைத்துப் போடவே சீனாவின் எண்ணை வர்த்தகக் கூட்டாளி ஈரான் மீதான இந்தத் தாக்குதலை செய்திருக்கிறது.
--- --- --- --- --- --- --- --- --- ---
இந்தப் போரானது உலக ஒழுங்கில் சீர்குலைத்து விட்ட ஒரு குறிப்பிடத்தக்க விடயம் அரச இறையாண்மை அழிப்பு - destruction of state sovereignty. எந்த நாடும் எந்த நாட்டையும் தாக்கலாம். ஜனாதிபதிகளை நேரடியாக தாக்கி கொல்லலாம். கடத்தலாம். மக்கள் மேல், மருத்துவமனைகள் மேல் குண்டு போடலாம். அதை வேறு எந்த நாடும் தட்டிக் கேட்காது, கேட்க முடியாது என்கிற நிலைமையை புதிதாக அமெரிக்கா ஏற்படுத்தியுள்ளது.
1648 ஆம் ஆண்டு தான் அரசுகளின் இறையாண்மை கோட்பாடு, வெஸ்பாலியா உடன்படிக்கை மூலம் நிறுவப்பட்டது. அதன் படி, ஒவ்வொரு நாடும் இறையாண்மை கொண்டுள்ளது. வேறொரு நாடு எல்லை தாண்டி அதன் மீது தாக்குதல் நடத்தவோ, அதன் சுதந்திரத்தை பறிப்பதோ இறையாண்மை உரிமையை மீறுவதாகும். அது கடுமையாக சர்வதேச சமூகத்தால் தண்டிக்கப்படும். இதுதான் அரசுகளின் அது சிறிதோ, பெரிதோ, அரசுகளின் உரிமைகளை, இறையாண்மையை பாதுகாக்க உருவாக்கப்பட்ட வெஸ்பாலிய கோட்பாடு ஆகும். அதை இன்று அமெரிக்கா தூக்கி எறிந்து விட்டது.
ஈரான் போர். அமெரிக்கா நினைத்ததை செய்துவிட்டது - அநுர இந்திய புதிய உறவு #iranus #india #IndiasRoleinPeaceEfforts. 25-03-2026 அன்று IBC Tamil இணையதளத்திற்கு வழங்கிய நேர்காணல்.
சமீபத்தில் ஈழத் தமிழருக்கிடையேயான ஒற்றுமையின்மை பிரச்சனைகளுக்கு தீர்வு காண ஸ்விஸ் நாடு முயல்வதாக செய்திகள் வெளியாகி இருக்கிறது. அந்நாட்டின் தூதுவர் இலங்கை பிரதமரை நேரில் சந்தித்து பேசியிருக்கிறார்.
உண்மையில் எங்கோ இருக்கும் ஸ்விஸ் நாடு இலங்கையில் உள்ள ஈழப் பிரச்சனையை அனுக வேண்டிய காரணம் என்ன. இதனால் ஈழத்தமிழருக்கு யாதொரு பயனும் ஏற்படப் போவதில்லை என்கிறார் வரலாற்றறிவியல் ஆய்வாளர் மு.திருநாவுக்கரசு அவர்கள்.
ஊடறுப்பு தளத்தின் நெறியாளர் தமிழரசுவுக்கு தந்த நேர்காணலில் இலங்கை அரசின் இந்த புதிய நகர்வு குறித்தும், ஈழப் பிரச்சனைக்கான தீர்வு குறித்தும் மு.திருநாவுக்கரசு அவர்கள் அளித்த நேர்காணல் கீழே..
ஊடறுப்பு தளத்திற்கு வழங்கப்பட்ட இந்த நேர்காணல் காணொளியில் மு.திருநாவுக்கரசு அவர்கள் கூறியுள்ள முக்கிய கருத்துக்கள் சிலவற்றின் வரிச் சுருக்கம் கீழே..
இலங்கையை ஆண்ட ஆளும் அரசுகள் எதுவாக இருந்தாலும் (இடதுசாரி போல நடிக்கும் அநுராவாக இருந்தாலும்) ஈழப் பிரச்சனைக்கு சமாதானத் தீர்வு காண்பதை ஒரு போதும் செய்யமாட்டார்கள். தங்கள் அரசுகளுக்கு அப்போது ஏற்படும் நெருக்கடிகளைச் சமாளிக்க தீர்வுகளாக எதையாவது பேசுவார்கள் செய்வார்களே தவிர நீண்ட கால சமாதானத் தீர்வு அவர்கள் நோக்கமாக ஒருபோதும் இருந்ததே இல்லை. இருக்காது.
கடல்சார் கொள்கை என்பது இல்லையென்றால் ஈழத்தமிழருக்கு இலங்கையில் வாழ்வே இல்லை. பாக் நீரிணைப்பு தான் அவர்களது பலம். அதைத் தான் சிங்கள அரசுகள் தங்களது பலவீனமாக , இந்தியாவின் ஆக்கிரமிப்பு நடக்கப் போகும் பகுதியாக தொடர்ந்து கருதி வருகிறார்கள். இதுவரை தமிழர் சம்பந்தமாக இலங்கை அரசுடன் செய்யப்பட்ட எந்த ஒப்பந்தங்களிலும் பாக் நீரிணை கடலின் உரிமையில் ஈழதமிழருக்கும் பங்கு என்கிற பேச்சே எழவிடவில்லை சிங்கள அரசுகள். அந்தக் கடல் பகுதி எப்போதுமே இலங்கை அரசிற்கு சொந்தமானதாகவே கொள்ளப்பட்டது. அந்தக் கடல்பகுதியை, அதன் அதிகாரத்தை ஈழத் தமிழருக்கோ, இந்தியாவுக்கோ ஒரு போதும் இலங்கை அரசு விட்டுத் தராது. பாக் நீரிணை என்பது சோழப் பேரரசின் காலத்திலிருந்தே இந்தியாவுக்கு பலமாக இருந்துள்ளது. இப்போது இந்தியாவின் கட்டுப்பாட்டில் பாக் நீரிணை இல்லை.
இலங்கை அரசு, ஈழத் தமிழர் மற்றும் இந்தியா இந்த மூன்றும் சந்திக்கும் ஒரு புள்ளியில் மட்டுமே ஈழத்தமிழர் பிரச்சனைக்கான தீர்வு மையம் கொள்ள முடியும். இந்தியாவால் மட்டும் சர்வதேச அளவில் இப்பிரச்சனையை தீர்த்துவிட முடியாது. ஒரு லட்சத்து 50 ஆயிரம் இந்திய ராணுவ வீரர்களை இலங்கைக்குள் இறக்க முடிந்தாலும் இந்தியாவால் பிரச்சனையை தீர்த்துவிட முடியவில்லை. முடியாது. அதற்கு இன்னொரு பலமான வெளி அரசின் ஆதரவு இந்தியாவிற்கு தேவைப்படும். அது வீட்டோ அதிகாரமுள்ள அமெரிக்கா அல்லது ரஷ்யாவாக இருக்கமுடியும். உலகில் உள்ள வேறு எந்த நாடும் இலங்கைப் பிரச்சனையில் நேரடியாகத் தலையிட்டு தீர்வு காணவோ, பேச்சு நடத்தவோ முயலாது.
நார்வே, ஸ்விஸ் போன்றவை அமெரிக்காவின் நிழல்தள நாடுகளாக இருப்பதன் பின்னணியில், ஈழப்பிரச்சனைக்குள் தலையிட அனுமதிக்கப்படுவது ்தொடர்ந்து நடந்து வந்திருக்கிறது. ஆனால் அவற்றால் ஈழத்தமிழருக்கு பலனில்லை. அவற்றால் தீர்வும் காண முடியாது. ஆனால் ஸ்விஸ் நாட்டிலுள்ள கேன்டன்ஸ்(cantons) எனப்படும் நாடுகளற்ற நிலையை நைசாக ஈழத் தமிழர் பகுதிகளுககான தாயகமற்ற, நாடற்ற தீர்வாக திணிக்க அது சிங்களருக்கு உதவலாம்.
கடந்த மூவாயிரம் ஆண்டுகளாக ரஷ்யா இந்தியா இடையே இணக்கமான உறவே இருந்து வந்திருக்கிறது. ரஷ்யாவிலிருந்து எந்தவித படையெடுப்புகளோ, படையெடுப்புக்கான ஆயத்தங்களோ கூட இந்தியாவை நோக்கி நிகழ்ந்ததில்லை. உக்ரைன் போரில் இந்தியா ரஷ்யாவை கண்டிக்கவில்லை. மனிதநேய உதவிகள் பற்றிப் பேசியதே தவிர ரஷ்யாவை விமர்சிக்கவில்லை. பங்களாதேஷ் பிரிவினையின் போது ரஷ்யா இந்தியாவுக்கு ஆதரவாக அமெரிக்காவை எதிர்த்து நின்றது. 1998ல் இந்தியா அணு ஆயுதம் தயாரித்த போது பொருளாதார தடையை எதிர் கொண்டது. அப்போதும் ரஷ்யா இந்தியாவை கண்டித்ததோடு நின்று கொண்டது, பொருளாதாரத் தடைகள் எதுவும் இந்தியா மீது விதிக்கவில்லை.
ஈழப் பிரச்சனையை சிங்களர்கள் தமிழின அழிப்பு, இந்திய எதிர்ப்பு என்கிற ஒரு நாணயத்தின் இரு பக்கங்களாகவே பார்க்கிறார்கள். இந்திய எதிர்ப்பை பலப்படுத்த ஒரே வழி இலங்கையில் தமிழினத்தை அழிப்பதுவே. இதுவே சிங்களர்களின் இந்திய ஆதிக்க எதிர்ப்பு வாதமுமாகும்.
2024ல் அப்போதைய நெருக்கடியை சமாளித்து இந்தியாவிடமிருந்து சில பலன்களைப் பெற பிரதமர் ரணில் இந்தியாவுக்கும் இலங்கைக்கும் இடையே கடற்பாலம் கட்டப்படும் என்கிற ஒப்பந்தத்தை செய்தார். தற்போதைய ஜனாதிபதி அநுரா அதை இந்தியாவின் விஸ்தரிப்பு வாதமாக பார்ப்பதோடு, பாலம் கட்டப்படும் வாய்ப்பு இல்லை என்றும் நிராகரித்துவிட்டார். அநுரா தொழிலாளர்களோடும், ஈழத் தமிழர் பகுதிகளில் வந்து செல்ப்பி எடுத்ததோடும் விளம்பரமாகச் செய்து தன்னை முற்போக்காக காட்டிக் கொள்ளமட்டுமே செய்திருக்கிறார். தொழிலாளர்களின் தோழர் என்று படம் காண்பித்தலே அவருக்கு போதுமானதாக இருக்கிறது. நிஜத்தில் ஈழத்தமிழருக்கு அவராலும் எந்த நன்மையும் இல்லை. இன்றும் தமிழர் பகுதிகளில் சிங்கள குடியேற்றங்கள் இருக்கின்றன. தமிழர் பகுதி முழுவதும் ராணுவம் நின்று கொண்டு இருக்கிறது. ஒரு காலத்தில் தமிழர் பகுதிகள் என்பதே இல்லை என்பதாக ஆக்கிவிடுவதே அநுரா குமாரவின் குறிக்கோளாகவும் இருக்கிறது.
30 ஆண்டுகளான ஈழப் போராட்டத்தில் ஈழத்தில் உள்ள பெரும் அறிவுஜீவிகள், தலைமைகள், தலைவர்கள் பெரும்பாலோர் கொல்லப்பட்டனர். பிறர் இடம் பெயர்ந்து விட்டனர். பலர் விரக்தியில் அரசியலை விட்டே விலகிப் போய்விட்டனர். இன்றைய நிலையில் ஈழத்தில் தமிழருக்கு வலுவான ஒன்றுபட்ட அரசியல் தலைமைகளை இல்லாமல் அனைத்தும் சீரழிந்து நிற்கிறது.
இலங்கை அரசியல் யாப்பின் முக்கிய தூண்கள் மகாசங்கம், ராணுவம் மற்றும் ராணுவவாதம். இவையே அதன் இனவெறியை நியாயப்படுத்தி அதை நோக்கி செயல்பட துணை நிற்கின்றன. எனவே ஜனாதிபதி முறையை இலங்கை அரசால் கைவிட இயலாது. யாப்பை மாற்ற இயலாது. 13 ஆவது திருத்தச் சட்டத்தை கைவிட நினைத்தால் இந்தியா இலங்கையை விடாது. இந்தியாவுக்கு இலங்கையில் இருக்கும் ஒரே துருப்புச் சீட்டு 13ஆவது திருத்தச் சட்டம் மட்டுமே. வேறு எதிலும் இந்தியாவை நம்பி இலங்கை இல்லை. (சீனா நேரடியாக ஈழப் பிரச்சனையில் தலையிடாது. ஆனால் இலங்கையின் வர்த்தக கூட்டாளி என்கிற அடிப்படையில் அனைத்து வகையான உதவிகளையும் இலங்கைக்கு தந்து ஆதரவாக நிற்கும்)
ரணில் - மோடி 2023 வரலாற்று ஒப்பந்தம் தகர்ப்பு. ஏன் ? மு.திருநாவுக்கரசு அவர்களின் நேர்காணல். 07.02.2026.
ஊடறுப்பு செய்தித் தளத்திற்காக வரலாற்றறிவியல் ஆய்வாளர் மு.திருநாவுக்கரசு அவர்கள் லங்காஸ்ரீ ஊடகவியலாளர் தமிழரசு அவர்களுக்கு வழங்கிய இணைய நேர்காணல். 07.02.2026.
ஜூலை 2023-ல் இந்தியப் பிரதமர் நரேந்திர மோடி மற்றும் இலங்கை ஜனாதிபதி ரணில் விக்ரமசிங்க இடையிலான டெல்லி சந்திப்பு, இரு நாடுகளுக்கும் இடையே ஒரு பொருளாதாரக் கூட்டாண்மை தொலைநோக்கு ஆவணத்தை (Economic Partnership Vision Document) உருவாக்கியது. இது எரிசக்தி, கடல்சார் மற்றும் வான்வழி இணைப்பு, வர்த்தகம், மற்றும் டிஜிட்டல் கட்டமைப்பு, அத்துடன் இந்தியா-இலங்கை இடையிலான நிலப் பாலம் (Land Bridge) அமைப்பதற்கான சாத்தியக்கூறுகள் உள்ளிட்ட முக்கிய துறைகளில் ஒத்துழைப்பை வலியுறுத்துகிறது.
ரணில் - மோடி ஒப்பந்தத்தின் முக்கிய அம்சங்கள்(ஜூலை 2023): பொருளாதார தொலைநோக்கு: நீண்ட காலப் பொருளாதாரக் கூட்டாண்மை, வர்த்தகம் மற்றும் முதலீடுகளை அதிகரிக்க ஒப்பந்தம் செய்யப்பட்டுள்ளது.
எரிசக்தி இணைப்பு: இரு நாடுகளின் மின்சாரக் கட்டமைப்பு (Electricity Grid) மற்றும் திருகோணமலை எரிசக்தி மையத்தை மேம்படுத்துதல்.
நிலப் பாலம் (Land Bridge): இந்தியா மற்றும் இலங்கையை இணைக்கும் நிலப் பாதையை உருவாக்குவதற்கான சாத்தியக்கூறுகளை ஆராய ஒப்புதல்.
டிஜிட்டல் மற்றும் வர்த்தக பரிவர்த்தனை: இந்திய ரூபாய் (INR) மூலம் வர்த்தகம் மற்றும் UPI அடிப்படையிலான டிஜிட்டல் கொடுப்பனவுகளை செயல்படுத்துதல்.
எரிபொருள் குழாய்: இலங்கைக்கு எரிபொருள் கொண்டு செல்ல குழாய் அமைக்கும் feasibility study.
பாதுகாப்பு மற்றும் இணைப்பு: கடல்சார், வான்வழி மற்றும் துறைமுக இணைப்பு (திருகோணமலை, கொழும்பு) மூலம் இருதரப்பு உறவை வலுப்படுத்துதல்.
இந்தியப் பிரதமர் மோடிக்கும் இலங்கை அதிபர் ரணில் விக்கிரமசிங்கேவுக்கும் இடையே 2023ல் வடிவமைக்கப்பட்ட இந்த வரைவு, பெயரளவில் ஒப்பந்தம் என்று அழைக்கப்பட்டாலும் ஒரு புரிந்துணர்வு ஒப்பந்தம் போல தெளிவற்ற உறுதிமொழியல்லாத விடயங்களையே கொண்டிருந்தது.
இந்த ஒப்பந்தத்தி்ல் வழக்கமான இரு நாடுகளிடையேயான பொருளாதார, தொழில் அபிவிருத்தி போன்றவை பேசப்பட்டிருந்தாலும் அதில் முக்கியமானது இந்தியாவின் தனுஷ்கோடிக்கும் இலங்கை மன்னாருக்குமிடையே கடல் மேல் ஒரு தரைவழிப் போக்குவரத்து பாலம் அமைப்பது என்பதாகும். இந்தப் பாலத்தின் நீளம் கடல்வழியே வெறும் 23 கி.மீ நீளமேயாகும்.
பார்க்க எளிதானது போலவும், இருநாடுகளும் விரும்பிச் செய்த விடயம் போலவும் காணப்பட்டாலும் இது உண்மையில் இலங்கை ஒருபோதும் செய்ய விரும்பிய விடயம் அல்ல. முழுக்க முழுக்க இந்தியாவின் முன்னெடுப்பின் பேரிலேயே இவ்விடயம் முன்னெடுக்கப்பட்டது. இந்தியாவையும் இலங்கையையும் வர்த்தக மற்றும் பொருளாதார ரீதியாக இணைப்பதில் இந்தப் பாலம் பெரும் பங்கை ஆற்றக் கூடும்.
ஆனால் சிங்கள அரசோ இந்தப் பாலம் கட்டப்பட்டால் இந்தியா தங்கள் மேல் ஆதிக்கம் செய்ய வசதியாகப் போய்விடும் என்று அஞ்சுகிறது. ராமர் இலங்கையோடு போர் செய்யவே பாலம் கட்டினார். எனவே, சிங்கள வரலாற்று மனங்களில் இந்தியாவிலிருந்து கட்டப்படும் பாலம் சிங்கள அரசின் மீதான ஆதிக்கப் போரையே குறிக்கும். அதனாலேயே 2024 ஆம் ஆண்டு டிசம்பர் மாதம் இந்தியாவுக்கு விஜயம் செய்த இலங்கையின் இடதுசாரி அதிபர் என வர்ணிக்கப்படும் அநுரா திசநாயகே இந்தியா - இலங்கை இடையேயான தரைவழிப் போக்குவரத்து பாலம் என்பது சாத்தியமில்லாதது என்று அதை நிராகரித்துச் சென்றுவிட்டார்.
இந்த நேர்காணலில் ஏன் இந்தியா - இலங்கை இடையையான கடல்வழியே தரைப்பாலம் என்பதை சிங்கள அரசுகள் ஒரு போதும் அனுமதிக்காது. வரலாற்றில் அப்படி ஒரு பாலம் ஒருபோதும் சாத்தியமில்லை என்பதை வரலாற்று அரசியல் நிகழ்வுகளின் ,பின்னணிகளின் ஊடே விளக்குகிறார் மு.திருநாவுக்கரசு அவர்கள்.
இலங்கை இந்தியா இடையே ஒரு பாலம் அமைப்பதானது இலங்கையை தனி நாடாக இருப்பதிலிருந்து மாற்றி இந்தியாவின் ஒரு இணைப்புப் பகுதியாக மாறுவதை நோக்கி கொண்டு செல்லும் என்றும், ஈழத் தமிழர்கள் இலங்கையில் சிங்களர்களை விடவும் அதிகாரம் பெறுவார்கள் என்றும் சிங்களர்கள் உள்ளூர அச்சப்படுகிறார்கள். தமிழர்கள் இலங்கையின் வடபகுதியிலும் இந்தியாவின் தென்முனையிலும் வாழ்வதால் ஈழத் தமிழர் மீதான, இந்தியா மீதான அச்சம் சிங்களருக்கு வரலாற்று ரீதியாக மகாவம்ச காலத்தில் இருந்தே தொடர்ந்து இருந்து வருகிறது.
இந்தியாவின் வரலாற்று மனோபாவமும் இலங்கையை இந்தியாவின் கட்டுப்பாட்டில் உள்ள ஒரு சிறு தீவு என்றே கருதி வந்திருக்கிறது. சிந்து நதியில் ஆரம்பித்து இலங்கை வரை இந்தியாவின் நீட்சி என்ற கருத்திலேயே சிங்களத்தீவிற்கொரு பாலம் அமைப்போம்என்று பாரதியாரே பாடியிருப்பதில் இருந்து இதை உணரலாம்.
அறிக்கைகளின்படி, ராமேஸ்வரத்தையும் (இந்தியா) தலைமன்னாரையும் (இலங்கை) இணைக்கும் முன்மொழியப்பட்ட சாலை மற்றும் ரயில் பாலத் திட்டத்திற்கு தோராயமாக 5 பில்லியன் டாலர் (சுமார் ₹24,000 கோடி முதல் ₹40,000 கோடிக்கும் மேல்) செலவாகும் என மதிப்பிடப்பட்டுள்ளது. ஆசிய வளர்ச்சி வங்கி (ADB) இத்திட்டங்களுக்கு நிதியளிக்கத் தயாராக இருப்பதாகத் தெரிவித்திருந்தாலும், இந்தத் திட்டம் நிதி உதவிக்காகப் பரிசீலிக்கப்பட்டு வருகிறது. 2015 ஆம் ஆண்டின் முந்தைய அறிக்கைகள், ஆசிய வளர்ச்சி வங்கி 3.5 பில்லியன் டாலர் (₹220 பில்லியன்) நிதியுதவி அளிப்பதாக உறுதியளித்திருந்ததாகத் தெரிவித்தன.
ஆனால் கடந்த 70 ஆண்டுகளுக்கும் மேல் இந்தியாவை நம்ப வைத்து செய்த அனைத்து ஒப்பந்தங்களிலும் இந்தியாவை கைகழுவி தோல்வியுறச் செய்த இலங்கை சிங்கள அரசுகள் இந்த இணைப்புப் பாலத்தை ஒருபோதும் நிறைவேற்றாது. ஒருவேளை இலங்கையில் தமிழர்கள் பகுதிகள் முழுவதும் சிங்களமயமாக்கப்பட்டு தமிழர்கள் தடயமின்றி அங்கே அழிக்கப்பட்டால் அது நிரந்தரமாக சாத்தியப்படாமலே போய்விடும். தனித்த சிங்கள நாடு என்கிற தாங்கள் உருவாக்கிவரும் அடையாளத்தை பேணவே சிங்களர் விரும்புவர். அப்படிப்பட்ட சிங்கள இனமயமாக்கல் மூலம் தமிழரை அழிப்பது தற்போது இலங்கையின் வடக்கு, கிழக்கு தமிழர் பகுதிகளில் நடத்தப்பட்டுக் கொண்டிருக்கிறது.
ஒருவேளை தமிழீழம் அமைந்தால் அது தமிழீழத்திற்கும் இந்தியாவுக்கும் இடையேயான பாலமாகத் தான் அமைய முடியுமே தவிர சிங்கள இனவாத இலங்கைக்கும் இந்தியாவுக்கும் இடையே இப்படி ஒரு பாலம் அமையவே முடியாது.
இலங்கை அரசுகளின் இந்த இந்திய எதிர்ப்பு வாதத்தை தெளிவாக விவரிக்கிறார் இந்த காணொளியில்.
லங்கா ஸ்ரீ பத்திரிக்கையின் ஊடறுப்பு நிகழ்வில், ஈழத்தைச் சார்ந்த வரலாற்று ஆய்வாளர் திரு மு.திருநாவுக்கரசு அவர்கள், நெறியாளர் தமிழரசுவுக்கு, 31-01-2026 அன்று வழங்கிய நேர்காணல்.
லங்கா ஸ்ரீ இணையதள நேர்காணலின் முதல் பகுதி:
லங்கா ஸ்ரீ இணையதள நேர்காணலின் இரண்டாம் பகுதி:
இந்த நேர்காணல்களில் அவர் கூறிய முக்கிய கருத்துக்கள் சில சுருக்கமாக கீழே...
- இந்த 2026ல் உலக ஒழுங்கு குலைந்திருக்கிறது. ஆனால் புதிய உலக ஒழுங்கு இன்னும் உருவாகவில்லை.
- America First என்கிற அமெரிக்காவின் தன்னை முன்னிலைப்படுத்தும் கருதுகோள் சிக்கலுக்கு உள்ளாகிறது.
- இந்த சீர்குலையும் உலக ஒழுங்கு சூழலில், இரு பெரும் நாடுகள் அல்லது நாட்டு அணிகளுக்கு இடையிலான பெரும்போர் தான் புதிய உலக ஒழுங்கை உருவாக்கக் கூடிய பலத்தை அப்போரில் வெற்றி பெறும் நாட்டிற்கு அல்லது வெற்றி பெறும் அணிக்கு வழங்கும். ஆனால் இத்தகைய சூழல் நடக்காததால் உலக ஒழுங்கை அமெரிக்காவால் மாற்ற முடியாது.
- சீர்குலையும் உலக ஒழுங்கில் சந்தைக்கான போட்டியில் அமெரிக்காவிற்கு சவாலாக இருப்பது சீனாவே. அமெரிக்கா ஏகாதிபத்தியம் கம்பெனிகளின் monoploy ஆக இருக்கிறது. சீனா அரசு சார்ந்த(state sponsored), சந்தை ஏகாதிபத்தியமாக, monoopoly ஆக இருக்கிறது. எனவே சீனாவின் பலம் அதிகமாக இருக்கும்.
- சீனா கடந்த 25 ஆணடுகளாக தொழில்நுட்பத்தை மேற்குலகிடமிருந்து பெற்றுக் கொள்ள தனது சந்தையை திறந்து விட்டது சீனா மற்றும் ரஷ்யா. சீனா உலக தொழில்நுட்பம் அனைத்தையும் பெற்று இன்று மிதமிஞ்சிய வளர்ச்சியடைந்து விட்டது.
- 45 வருட தொழில்நுட்பமயமாக்கப்பட்ட உற்பத்தியால், மாசுபடுத்தப்பட்ட சுற்றுப்புறச் சூழலால் ஆர்க்டிக் கடல் உருகுகிறது. அது புதிய எளிதான கடல்வழிப்பாதையை உலக வர்த்தகத்திற்கு ஏற்படுத்துகிறது. இதைப் பயன்படுத்தி சீனா தனது உற்பத்திப் பொருட்களை மேற்குலகம், கனடா மற்றும் உலகநாடுகள் அனைத்திற்கும் கொண்டு செல்வது இன்னும் எளிதாகிறது. எனவே தான் இந்தப் பாதையில் இருக்கும் கிரீன்லாந்தை கைப்பற்ற அமெரிக்கா முயல்கிறது. சீனாவின் எளிய கடல்வழிப் பாதையை தனது கட்டுக்குள் வைக்க முயல்கிறது.
- முதலாம் , இரண்டாம் உலகப் போர்கள் முதலாளிகளுக்கும், தொழிலாளி வர்க்கத்திற்கும் இடையேயான போர்கள் அல்ல. வளர்ச்சியடைந்த முதலாளிகளிடையே நடந்த பன்னாட்டு சந்தைப் பிடிப்பின் போட்டியால் நடந்த போர்களே ஆகும். முதலாளி வர்க்கம் என்கிற ஒரே வர்க்கத்துக்குள்ளேயே நடந்த முரண்களே இந்தப் போர்கள் ஆகும்.
- அமெரிக்கா ஈரானுடன் நேரடியாக போரில் இறங்கும் வாய்ப்பு குறைவு. ஈரான் மேல தாக்குதல்கள் செய்யலாம். தலைவர்களை கொல்லலாம். உள்நாட்டில் குழப்பங்களை ஏற்படுத்தலாம். ஆனால் நேரடியாக போரில் இறங்குவது சரியான அமெரிக்காவின் முடிவல்ல. தேவையுமல்ல.
- இன்றைய உலக ஏகாதிபத்திய சந்தைப் போட்டியில் கிரீன்லாந்து, வெனிசூலா மற்றும் இலங்கை ஆகிய போட்டிக்கான குவிமையங்கள் உள்ளன.
- தந்தை செல்வா காலம் முதலே தமிழர்கள் சுயாட்சி என்பதை அடைய முடியாமலே சிங்கள ஆளும் வர்க்கத்திடம் தொடர்ந்து தோல்வியடைந்தே வந்துள்ளனர். ஒரு தலைவரும் சிங்கள ஆளும் வர்க்கத்தின் அரசியலை வெற்றிகரமாக புரிந்து உலக அரசியலை செய்ததில்லை.
- பாக் நீரிணை தமிழரின் கட்டுப்பாட்டில் இருந்தவரை ஈழப் போராட்டம் வென்றது. பாக் நீரிணை தமிழரை விட்டுப் போனபின்பு ஈழப் போராட்டம் எளிதில் அழிக்கப்பட்டது.
- இந்திராகாந்தி காலத்தில் 1984ல் இந்திரா-பார்த்தசாரதி தீர்வு ஒன்று திட்டமிடப்பட்டது. கிரேக்க-துருக்கி தீர்வு போல, ஒரு நாடு - இரு அரசுகள் என்கிற அமைப்பை உருவாக்க தமிழர் பகுதியில் படையை இறக்கி இந்தியப் படை தமிழர் பகுதியை ஆளும் என்றும், சிங்களர் பகுதியை சிங்களர் ஆளட்டும் என்றும் திட்டமிடப்பட்டது. அது நிறைவேற்றப்படுவதற்குள் இந்திராகாந்தி கொல்லப்பட்டார்.
தடம் இணைய இதழுக்கு மு.திருநாவுக்கரசு அவர்கள் வழங்கிய இந்த நேர்காணலானது, 5 காணொலி பாகங்களாக யூட்யூப் இணையத்தில் வெளியிடப்பட்டுள்ளது. அந்தக் காணொலிகளின் இணைப்புகள் கீழே தரப்பட்டுள்ளன.
இலங்கையில் சிங்களர், இலங்கை பிரித்தானிய ஆதிக்கத்திலிருந்து 1948ல் விடுதலை அடைவதற்கு முன்பும் கூட தமிழரை தங்கள் இனத்தின் எதிரிகளாகவே கருதிவந்தார்கள் என்பதற்கு வரலாற்று சம்பவங்கள் நிறையவே உண்டு.
1948ல் பெரும்பான்மையான பலத்துடன் இலங்கையின் அரசை கைப்பற்றியதிலிருந்து திட்டமிட்ட வகையில் தமிழர்கள் மீதான இனப்படுகொலை திட்டத்தை தொடர்ந்து அரங்கேற்றி வந்துள்ளனர் சிங்களர்.
1980களில் ஆயுதப் போராட்டம் தமிழரால் சிங்களர் சித்திரவதைக் கொடுமைகளை எதிர்த்து ஆரம்பிக்கப்பட்டது. 1983 ல் யாழ் பகுதியில் வந்து கொண்டிருந்த ஒரு ராணுவ வேனை விடுதலைப் புலிகள் கண்ணி வெடி வைத்து தகர்த்ததில் அதில் பயணம் செய்த 13 சிங்கள ராணுவ வீரர்கள் கொல்லப்பட்டனர்.
கொல்லப்பட்ட ராணுவ வீரர்களின் உடல்களை கொழும்பில் வைத்து தகனம் செய்ய சிங்கள அரசு முயல, ஆனால் சிங்கள இனவெறியாளர்கள் அந்த வீரர்களின் உடல்களை அவரவர் சொந்த ஊர்களுக்கு அனுப்பி அங்கே அவ்வுடல்களை வைத்து பெரும் ஊர்வலங்கள் நடத்தி தமிழர் மீதான வெறுப்புணர்வில் நெய் ஊற்றினர்.
இதைச் சாக்காகக் கொண்டு தமிழரைக் கொல்ல சிங்கள அரசு அதிகாரத்திலிருந்தவர்கள் திட்டமிட்டனர். அதைத் தொடர்ந்து தமிழ்ப் பகுதிகளில், ஜூலை 23 முதல் ஜூலை 30 வரை சிங்களரால் சிங்கள அரசின் ஆதரவோடு, சாதாரண பொதுமக்களான ஈழத்தமிழரை கும்பல் கும்பலாக சேர்ந்து சிங்கள இனவெறியர்கள் அடித்து, எரித்து, பாலியல் வன்புணர்வு செய்து, தீயில் தூக்கிப் போட்டு , இப்படி பலவாறாக கொலை செய்தார்கள்.
தமி்ழ் மக்களின் வீடுகளில் ராணுவம் மற்றும் போலீஸ் உதவியுடன் புகுந்த
சிங்களர்கள் தமிழரை சித்திரவதை செய்து கொன்றதுடன் அவர்கள் வீட்டிலிருந்த அனைத்து உடைமைகளையும் கொள்ளையடித்து அல்லது அழித்துச் சென்றார்கள்.
இலங்கை வெலிக்கடை சிறையிலும் இந்தப் படுகொலையை ஒட்டி ஏற்கனவே சிறைத் தண்டனையில் வைக்கப்பட்டிருந்த புளோட் ஆயுதப் போராட்டக் குழுவின் குட்டிமணி, ஜெகன், தங்கதுரை மூன்று பேரையும், அவர்களையும் சேர்த்து மொத்தம் 35 தமிழர்களை , சிறைக்குள்ளேயே சிங்கள இனவெறியர்கள் சிறைத்துறையின் அனுமதியோடு, சித்திரவதை செய்து கொன்றனர்.
1983 யூலைக் கலவரத்தினால் 3000 பேர்வரை, தமிழர்கள் குழந்தைகள் முதல் பெண்கள், பெரியவர்கள் வரை என அனைத்து வயதுகளிலும் கொல்லப்பட்டனர், பத்துலட்சம் பேர் இடம் பெயர்ந்து சென்று முகாம்களில் அடைக்கப்பட்டனர். 13 சிங்கள ராணுவ வீரர்கள் கொல்லப்பட்டதற்கு எதிர்வினை என்பதாக சிங்கள அரசு இதைத் திட்டமிட்டு செய்து முடித்தது. இது திட்டமிட்ட செயல்தான் என்பதற்கு எண்ணற்றோர் சாட்சிகளாக உள்ளனர், திரு மு.திருநாவுக்கரசு அவர்களும் அப்படி ஒரு சாட்சியாக நடந்த படுகொலைகள் பற்றிய உண்மைகளை உரைக்கிறார்.
நடத்தப்பட்ட யூலைக் கலவரம், படுகொலைகள் சம்பந்தமாக, தனது அனுபவங்களையும், அப்போதைய சிங்களரின் இன அழிப்பு அரசியலையும் பற்றி இந்தக் காணொலியில் விவரிக்கிறார் வரலாற்று ஆய்வாளரும் , வரலாற்று ஆசானுமாகிய திரு மு.திருநாவுக்கரசு அவர்கள்.
தடம் இணையத்துக்கு வழங்கிய பேட்டியின் காணொலி.
காணொலி பாகம் 1.
கருப்பு ஜூலை புகைப்படம் வெளிவந்தது எப்படி? | Welikada Prison Massacre
காணொலி பாகம் 2
மகாவம்சம் சொல்வது ; தமிழர்கள் மிருகத்தைவிட கேவலமானவர்கள் | Tamil Tigers peace Talks
இந்தியாவின் வெளியுறவுத்துறைச் செயலர் தீக்சித் அவர்களின் கூற்றுப்படி, இந்திய-இலங்கை ஒப்பந்தத்தை முறித்தது சிங்கள அரசே. விடுதலைப் புலிகள் அல்ல.
கீழ்க்காணும் Assignment Colombo என்கிற புத்தகத்தின் பக்கங்களில் அவர் தந்த அறிக்கையை படிக்கலாம்.
காணொலி பாகம் 3
இலங்கையின் ஜனாதிபதியும் இடதுசாரித் தலைவருமான அநுரகுமார திசநாயகே ஏன் இதுவரை முள்ளிவாய்க்கால் இனப்படுகொலைகளுக்கு வருந்தி ஒரு மலர்வளையும் கூட வைத்ததில்லை ?
இலங்கை இரண்டாக கண்டிப்பாக உடையும். தமிழருக்கான ஒரு தனி நாடு உருவாகியே தீரும். அப்போது ஜே.வி.பி மீண்டும் ஒரு இன அழிப்பை முன்னெடுக்கும். குறைந்தது இரண்டு லட்சம் பேர் கொல்லப்படுவார்கள். ஆனால் இலங்கை பிரிவதைத் தடுக்க இயலாது.
காசா படுகொலைகளையும், உலகெங்கும் உள்ள இனப்படுகொலைகளையும் ஆண்டுதோறும் இன்றும் நினைவு கூறும் தமிழ்நாட்டு இடதுசாரிகள் முள்ளிவாய்க்கால் நினைவுகளை ஏன் ஒரு முறை கூட நினைவு கூரவில்லை ? கம்யூனிசம் என்கிற தத்துவத்திற்கே இது இழுக்கு இல்லையா.
இலங்கை தீவு இரண்டாக உடையும் ஆபத்து என்கிற தலைப்பில், 20 ஏப்., 2025 அன்று, வரலாற்று ஆய்வாளர் மு.திருநாவுக்கரசு அவர்கள் ஊடறுப்பு யூட்யூப் வலைத்தளத்திற்கு வழங்கிய பேட்டி.
இலங்கையின் ஆதி குடி குவேனி தமிழச்சியா ? | History of Sri Lanka | Vijayan Kuveni Story| Thiru Master
மகா வம்சத்தில் குவேனி என்கிற தமிழ்ப் பெண், சிங்களவரான விஜயன் தன் சகோதரர்களுடன் முதன் முதலில் இலங்கைத் தீவில் கால் வைத்த போது இலங்கையில் வாழ்ந்த ஒரு தமிழ் இளவரசி என்று குறிப்பிடப்படுகிறது.
ஆய்வாளர் திருநாவுக்கரசு அவர்கள் ஆய்ந்ததன் படி, குவேனி, விஜயன் போன்ற கதாபாத்திரங்கள் புனைவு கதாபாத்திரங்களே. வரலாற்றில் இருந்த நிஜமான மனிதர்கள் இல்லை.
அரசுகளுக்கு எந்தவித தர்ம சிந்தனையோ, இரக்கமோ, நேர்மையோ கிடையாது. அவை எந்த தத்துவத்தை பின்பற்றி சென்றாலும் தங்கள் சுயநலனுக்காகவே முடிவுகள் எடுக்கின்றன. செயல்படுகின்றன.
கொரோனா காலத்திற்கு பின்பு , உக்ரைன் போர் வெளிக்காட்டுவது என்னவென்றால், உலகமானது அமெரிக்காவை மையம் கொண்ட ஒற்றை மைய அரசியல் போக்கிலிருந்து விலகி, பல்வேறு மையங்கள் கொண்ட புதிய அரசியல் சூழலை நோக்கிப் போகிறது.
மகிந்தவுக்காக களத்தில் இறங்கிய சீனா. மு.திருநாவுக்கரசு அவர்கள் நேர்காணல். ஊடறுப்பு தள நேர்காணல் காணொலி,
மேலேயுள்ள காணொலி உரையில் கூறப்பட்ட சில முக்கிய கருத்துக்கள் கீழே:
சீனாவின் வளர்ச்சியால் இதுநாள் வரை அமெரிக்காவை தலையாகக் கொண்ட ஒற்றை மைய அரசு இப்போது மீண்டும் இரட்டை மைய அரசாக பரிணமிக்க ஆரம்பித்துள்ளது.
இரண்டாம் உலகப் போரில் வெற்றி பெற்றாலும் பெரும் அழிவுகளையும் சந்தித்த உலகப் பேரரசுகள், அதன் பின்பு இனி எந்தப் போர் நடந்தாலும் தங்கள் நாடுகளில் நடக்காமல், தாங்கள் பாதிக்கப்படாமல், பிற நாடுகளிலும் பிற கண்டங்களிலும் நடத்திக் கொள்வது என்கிற முடிவை எடுத்தன.
அப்படி நடத்தப்பட்ட ஒரு போர் உக்ரைன் போர். பலவீனமடைந்துவிட்ட ரஷ்யாவை உக்ரைன் போரின் மூலம் அதன் பொருளாதாரத்தை அழித்துவிட முடியும் என்று நினைத்த அமெரிக்காவிற்கும் அதன் ராணுவச் செயலகம் பென்டகனிற்கும் இந்த முன்னெடுப்பு பெரும் தோல்வியைக் கொடுத்திருக்கிறது.
2025 மார்ச் மாத ஆரம்பித்தில் முன்னாள் அரசுத்தலைவர் ரணில் விக்கிரமசிங்க, அல் ஜசீரா தொலைக்காட்சிக்கு அளித்த சர்ச்சைக்குரிய நேர்காணலுக்குப் பிறகு, பட்டலந்தை முகாம் குறித்து அவர் கூறிய கருத்துக்களால், மனித உரிமை மீறல்களுக்கான பொறுப்புக்கூறல் குறித்தும், பட்டலந்தை வதை முகாம் குறித்தும் நாட்டில் அனைத்து தரப்பிலிருந்தும் கடுமையான விமர்சனங்களை எதிர்கொண்டார்.
இதன் பின்னர் பட்டலந்தை ஆணைக்குழுவின் முழுமையான அறிக்கை ஜேவிபி அரசாங்கத்தினால் நாடாளுமன்ற அவைத் தலைவர் பிமல் இரத்திநாயக்கவினால் 2025 மார்ச் 14 அன்று சமர்ப்பிக்கப்பட்டது. அத்துடன், சட்ட நடவடிக்கைக்காக சட்டமா அதிபருக்கு அனுப்பப்படும் என்றும் அவர் அறிவித்தார்.
ரணில் விக்கிரமசிங்க, பட்டலந்தை ஆணைக்குழுவின் அறிக்கையின் முடிவுகளைக் கடுமையாக நிராகரித்து, அது தனது நற்பெயருக்கு களங்கம் விளைவிக்கும் அரசியல் ரீதியான முயற்சி என்று கூறினார். ஆணைக்குழு உருவாக்கப்பட்டது தன்னை இழிவுபடுத்தும் நோக்கத்தால் தூண்டப்பட்டது என்றும், ஆனால் இறுதியில் அந்த இலக்கை அடைய முடியவில்லை என்றும் வலியுறுத்தினார்.
1988-1990 கிளர்ச்சியின் போது காவல்துறை அதிகாரிகளுக்கு வீட்டுவசதி வசதி செய்வதில் தனது பங்கை மட்டுமே அறிக்கை குறிப்பிடுவதாக விக்கிரமசிங்க சுட்டிக்காட்டினார், இந்த செயல்பாடு நிறுவப்பட்ட விதிமுறைகளின்படி நடத்தப்பட்டதாகவும் அவர் கூறினார்.
லங்கா ஸ்ரீ செய்தி ஊடகத்திற்கு வழங்கிய செவ்வியில், ஊடறுப்பு என்கிற தலைப்பில் நடந்த காணொலி உரையாடலில், சமீபத்தில் நிகழ்ந்த இந்த அரசியல் நிகழ்வுகளின் பின்புலத்தில் ரணில் விக்கிரமசிங்கேயின் பங்கு பற்றி, சிங்கள ஒடுக்குமுறையின் தீவிரமான விஷயங்களை பற்றி தெளிவாக்குகிறார் அரசறிவியல் ஆசான் மு.திருநாவுக்கரசு அவர்கள்.
அந்தக் காணொலி யூட்யூப் வலைத்தளத்தில் காணலாம். அதன் இணைப்பு கீழே.
02 March 2025 அன்று ஊடறுப்பு இணைய செய்தித் தளத்திற்கு மு.திருநாவுக்கரசு அவர்கள் வழங்கிய பேட்டியின் காணொலி.
இலங்கையில் அநுரா தலைமையிலான அரசு புதியதொரு யாப்பை கொண்டு வருவோம் என்று கடந்த தேர்தலின் போது அறிவித்திருந்தது.
அநுரா அரசு பதவியேற்றும் பெரும்பான்மை பெற்றிருந்தும் இன்னும் அதுபற்றிய நகர்வுகள் எதுவும் பெரிதாக எடுக்கப்படவில்லை.
அத்தகைய புதிய யாப்பு ஒன்றை உருவாக்குவாரா அநுர ? ஏன் புதிய யாப்பு பற்றிய பேச்சு எழுகிறது. புதிய யாப்பு தேவையா. புதிய யாப்பு கொண்டு வருவதின் உள்ளே பொதிந்துள்ள சிங்கள நலன்கள் என்ன. சீனாவின் நலன்கள் என்ன இருக்கின்றன. தமிழருக்கு புதிய யாப்பு வந்தால் எதுவும் விடிவு காலம் வருமா,
இது போன்ற பல்வேறு கேள்விகளைப் பற்றி ஆராய்ந்து வரலாற்று ரீதியான பதில்களை, தேடல்களை இக்காணொலியில் முன்வைக்கிறார் வரலாற்றறிவியல் ஆய்வாளர் மு.திருநாவுக்கரசு அவர்கள்.
பேட்டியின் காணொலி:
்இந்த உரையாடலில் பேசப்பட்டுள்ள சில முக்கிய கருத்துக்கள் கீழே குறிப்புகளாக தரப்பட்டுள்ளன.
இலங்கையில் புதிய யாப்பு கொண்டு வருவதாக அநுர அரசு சொன்னாலும் மகாசங்கமும், சிங்கள ராணுவம் அத்தகைய யோசனையை விரும்பவில்லை.
மகாசங்கத்தின் நோக்கம் மாகாண சபை அமைப்புக்களை நீக்க வேண்டும் என்பதும், முஸ்லீம்கள் விகிதாச்சார முறைப்படி அதிக சீட்டுக்களைப் பெறுவதை தடுக்க வேண்டும் என்பதுமே.
ஜனாதிபதி முறை அரசுக்கும் , ராணுவத்துக்கும் மிகுந்த அதிகாரம் தருவதால் ஜனாதிபதி முறையை ஒழிக்க இருவருமே விரும்பவில்லை.
அநுர அரசு பெரும்பான்மை இருப்பதால் உண்மையிலேயே புதிய யாப்பு உருவாக்குவதில் அக்கறை இல்லை. தேர்தலுக்காக சொல்லப்பட்டதே அது.
இந்தியாவுக்கு இலங்கையில் இருக்கும் ஒரே பிடி மாகாண சபை அமைப்புகள் தான். அதை நீக்கினால் இந்தியா தீவிரமாகும் என்பதால் அதை நீக்காமலே டம்மியாக வைத்திருந்து மேலும் அதை பலனற்ற ஒரு அமைப்பாக நீர்த்துப் போகச் செய்யவே முயலுவார்கள்.
இப்படியான சிந்தனை சீனாவிடமிருந்து தான் இலங்கை அரசுக்கு தரப்படுகிறது. சீனா தேசிய இனங்களின் உரிமைகளை எப்போதுமே சமமாக மதித்ததில்லை. தனது நாட்டிலேயே அது அவர்களை சீன கட்சிக்கு கட்டுப்பட்ட சில உரிமைகளை கெஞ்சி கேட்டுக்கொள்ளும் அளவிலேயே தான் வைத்திருக்கிறது. அதையே இலங்கையிலும் சிறுபான்மை தேசிய இனங்கள் மேலும் பயன்படுத்த சிங்கள அரசுக்கு சீனா ஆலோசனையும் உதவியும் செய்கிறது.
1984 இந்தியா இலங்கை ஒப்பந்தம், பார்த்தசாரதியால் துருக்கி-கிரேக்கம்-சைப்ரஸ் ஸ்டைல் தீர்வை மையப்படுத்தி தான் உருவாக்கப்பட்டது. துருக்கி ராணுவம் கிரேக்கத்தில் உள்ள 20 சதவீத துருக்கியரை கிரேக்கர்கள் துன்புறுத்துவதை படுகொலை செய்வதை தடுக்கும் விதமாக கிரேக்கத்தில் இறங்கி துருக்கியரை பாதுகாத்தது. இன்றுவரை அந்த ராணுவம் கிரேக்கத்தில் இருக்கிறது. இந்திராகாந்தி படுகொலைக்குப் பின்பு அனைத்தும் மாற்றப்பட்டு தலைகீழாக யோசிப்பவர்கள் அங்கே வந்ததால் அது கைவிடப்பட்டுவிட்டது.
இந்திய கொள்கை வகுப்பாளர்கள் யாரிடமும் தற்போது இலங்கைப் பிரச்சனையில் தலையிட்டு தமிழர்களை காப்பது என்பதே கிடையாது. இந்தியாவின் வெளியுறவுக் கொள்கைகளில் கடல் பகுதி சார்ந்து முக்கியத்துவம் கொடுக்கப்பட்டதே இல்லை. நேரு - பணிக்கர் காலத்தில் துவங்கி அவ்வாறு தான் இருந்தது. இந்தியாவில் பல நூற்றாண்டுகளுக்கு முன்பு சோழ மன்னர்கள் கொண்ட கடல்சார் வெளியுறவுக் கொள்கைகளே இந்தியாவுக்கு தேவையான வெளியுறவுக் கொள்கையின் முன்மாதிரியாகும். ஆனால் இன்றுவரை அதுபற்றி இந்திய கொள்கை வகுப்பாளர்கள் சிந்திக்கவே இல்லை.
ஒருவேளை இலங்கையில் தமிழர்கள் அழிக்கப்பட்டுவிட்டால் பாக் நீரிணை சீனாவின் வசமாகிவிடும். அப்படி நிகழும்போது அடுத்து வரும் பத்தாண்டுகளில் இந்தியாவை இரண்டு மூன்று துண்டுகளாக உடைக்கும் நகர்வுகளை சீனாவால் நிறைவேற்ற முடியும்.
22,பிப்ரவரி, 2025 அன்று ஊடறுப்பு ஊடகத்திற்கு மு.திருநாவுக்கரசு அவர்கள் வழங்கிய பேட்டி.
இலங்கையில் சமீபத்தில் நீதிமன்ற வளாகத்தில் நடத்தப் பெற்ற துப்பாக்கிச் சூட்டில் சஞ்சீவா குமர சமரத்னே என்கிற பாதாள உலகின் தலைவன் கொல்லப்பட்ட சம்பவத்தின் பின்னாலுள்ள பாதாள உலக கும்பலின் பின்னணி, அதன் அரசியல், சமூக காரணங்களை விளக்குகிறார் மு.திருநாவுக்கரசு அவர்கள்.
இலங்கையில் பாதாள உலகை வளர்த்துவிட்டவர்கள் சிங்கள ஆட்சியாளர்கள். ஆட்கள் கடத்தல், படுகொலைகள் செய்தல் போன்ற காரியங்களுக்கு பாதாள உலகத்தைச் சார்ந்தவர்கள் பயன்படுத்தப்பட்டார்கள். இந்த நிழலுலகத்தைச் சேர்ந்தவர்கள் பெரும்பாலும் சிங்களர் அல்லாத வேறு சமூகத்தைச் சேர்ந்தவர்கள். 2009 முள்ளிவாய்க்காலுக்குப் பின்பு , கோத்தபய அரசால் அவர்களுக்கு அதுவரை உதவியாயிருந்த இந்த நிழலுலக தலைவர்கள் பலர் கொல்லப்பட்டிருக்கிறார்கள்.
காணொலி:
பாதாள உலக கும்பலை வளர்த்துவிட்டவர்கள் தொடர்பில் வெளிவரும் அதிர்ச்சி தகவல்கள்! | UDARUPPU | Ganemulla
